कार्यालयहरूमा सामग्री आपूर्ति गर्ने स्टोरको
एउटा पुरानो बिक्री खाता खोतल्दै
म तयारी गरिरहेकी छु
किन्नलाई सिङ्गो संसार ।
त्यो हो एउटा ग्लोब
मात्रै पचास डलरको छ
विक्रेता भन्छ
एक सय पन्चानब्बे देशलाई किनिहाल्नुहोस्
जम्मा पचास डलरमा ।
म सोच्छु
यसको मतलब त यो हुने भयो कि
जम्मा पच्चीस सेन्टमा एउटा देश ।
यदि मैले तपाईँलाई एक डलर दिएँ भने
के तपाईं यस ग्लोबमा
समावेश गर्नुहुन्छ प्यालेस्टाइनलाई ?
उसले फर्केर सोध्यो,
तपाईँ यसलाई कुन ठाँउमा राख्न चाहनुहुन्छ ?
मैले भनेँ,
ती सारा ठाउँहरूमा
जहाँ जहाँ बस्छन् प्यालेस्टाइनीहरू ।
रचनाः प्यालेस्टाइनी कवि इब्तिसाम बरकत
अनुवादः चन्द्र गुरुङ
साभारः ‘जहाँ आमाहरू कहिल्यै निदाउँदैनन्ः चुनिएका प्यालेस्टाइनी कविता‘ कविता संग्रह
