काठमाडौं, प्रधानमन्त्री केपी शर्मा ओलीले भूकम्पले क्षतिग्रस्त संरचना पुनर्निर्माणको काम एक वर्षमा पूरा हुने बताउनुभएकाे छ । अहिले पुनर्निर्माणको काम युद्धस्तरमा अघि बढेको उहाँले बताउनुभएकाे छ ।
२०७२ सालमा गोरखाको बारपाक केन्द्रविन्दु भएर विनासकारी भूकम्प गएको चार वर्ष पुगिसके पनि पुनर्निर्माणको काम सन्तोषजनक नभएको भनेर कतिपयले सरकारको आलोचना गरिरहेका बेला प्रधानमन्त्रीको यस्तो भनाइ सार्वजनिक भएको हो ।
गोरखा भूकम्पको वार्षिकीमा प्रधानमन्त्री ओलीले सामाजिक सञ्जाल ट्वीटरमा लेख्नुभएकाे छ – ‘सयौं वर्ष अघिदेखिका संरचनाहरु एकैछिनमा ढल्छन् र तिनीहरुको पुनर्निर्माण गर्न वर्षौं लाग्छ । हामीले युद्धस्तरमा अघि बढाएको पुनर्निर्माणलाई अबको एक वर्षमा पूर्णतामा पुर्याउँछौं ।’ गोरखा भूकम्पले सुरक्षित आवास र भौतिक पूर्वाधार निर्माणमा सजगताको पाठ सिकाएको प्रधानमन्त्री ओलीले लेख्नुभएकाे छ ।
५ पुस ०७२ मा पुनर्निर्माण सम्बन्धी ऐन जारी भएर ५ वर्षका लागि गठन भएको प्राधिकरणले १२ पुसमा औपचारिक रुपमा काम सुरु गरेको थियो । प्राधिकरणले काम सुरु गरेको वैशाख १२ गते ४० महिना भइसकेको छ भने अब यसको अवधि २० महिना बाँकी छ ।
हालसम्म निजी आवास पुनर्निर्माण समग्रमा ८० प्रतिशत सम्पन्न भइसके पनि पुरातात्विक सम्पदाको पुनर्निर्माण भने बाँकी २० महिनाको अवधिमा सकिनेमा प्राधिकरण नै सशंकित छ । २०७२ साल वैशाख १२ गते र त्यसपछिका परकम्पहरुबाट ३१ जिल्लामा ठूलाे जनधनको क्षति भएको थियो । भूकम्पपछिको आवश्यकता आंकलन प्रतिवेदन (पिडिएन) अनुसार ८ हजार ७९० जनाले ज्यान गुमाए भने २२ हजार ३सय जना घाइते भएका थिए ।
यस्तै ४ लाख ९८ हजार ८५२ निजी घर, २ हजार ६५६ सरकारी भवन र विद्यालयका १९ हजारभन्दा बढी कक्षा कोठा पूर्ण रुपमा क्षति भएका थिए ।
