काठमाडौँ । प्रधानमन्त्री पुष्पकमल दाहाल ‘प्रचण्ड’ र राष्ट्रपति रामचन्द्र पौडेलबिचको भेटवार्ताबारे भ्रम फैलाइएको बारे प्रधानमन्त्रीको सचिवालयले खण्डन गरेको छ । आज बिहिवार एक अनलाइनमा प्रकाशित ‘‘राष्ट्रपति पौडेल र प्रधानमन्त्री प्रचण्डबीचको त्यो भेट, गोप्य प्लान सुनेपछि झस्किए राष्ट्रपति’’ शीर्षकको समाचारप्रति सम्माननीय प्रधानमन्त्रीज्यूको सचिवालयको गम्भीर ध्यानाकर्षण भएको जनाएको छ ।
सचिवालयले समाचारमा भनिएजस्तो राष्ट्रपतिज्यूसँगको भेटपछि सम्माननीय प्रधानमन्त्रीले राजीनामा नदिने मनस्थिति बनाएको भन्ने समाचार अत्यन्तै भ्रामक र तथ्यहीन भएको, राष्ट्रपतिसँगको भेटअघि नै २०८१ असार १८ गते मंगलबार बिहान बसेको नेपाल कम्युनिस्ट पार्टी (माओवादी केन्द्र) को कार्यालयको बैठकले प्रधानमन्त्रीले राजीनामा नदिई संसदसमक्ष प्रस्तुत हुनुपर्ने निर्णय लिएको कुरा उल्लेख गर्दै पार्टी पदाधिकारीको सोही निर्णयअनुरूप भेटमा प्रधानमन्त्रीले राष्ट्रपतिलाई आफू संवैधानिक प्रक्रियाअनुरूप नै अगाडि बढ्ने जानकारी गराउनुभएको जनाएको छ ।
प्रधानमन्त्री प्रचण्डको सचिवालयद्वारा गरिएको खण्डनको पूर्णपाठः
आज बिहीबार ‘‘बिजमाण्डु’’ नामक एक अनलाइनमा प्रकाशित ‘‘राष्ट्रपति पौडेल र प्रधानमन्त्री प्रचण्डबीचको त्यो भेट, गोप्य प्लान सुनेपछि झस्किए राष्ट्रपति’’ शीर्षकको समाचारप्रति सम्माननीय प्रधानमन्त्रीज्यूको सचिवालयको गम्भीर ध्यानाकर्षण भएको छ ।
समाचारमा भनिएजस्तो सम्माननीय राष्ट्रपतिज्यूसँगको भेटपछि सम्माननीय प्रधानमन्त्रीले राजीनामा नदिने मनस्थिति बनाएको भन्ने समाचार अत्यन्तै भ्रामक र तथ्यहीन हो । बदलिएको राजनीतिक परिस्थितिबारे छलफल गर्न सम्माननीय राष्ट्रपतिज्यूसँगको भेटअघि नै २०८१ असार १८ गते मंगलबार बिहान बसेको नेपाल कम्युनिस्ट पार्टी (माओवादी केन्द्र) को कार्यालयको बैठकले प्रधानमन्त्रीले राजीनामा नदिई संसदसमक्ष प्रस्तुत हुनुपर्ने निर्णय लिएको थियो । पार्टी पदाधिकारीको सोही निर्णयअनुरूप भेटमा प्रधानमन्त्रीले सम्माननीय राष्ट्रपतिज्यूलाई आफू संवैधानिक प्रक्रियाअनुरूप नै अगाडि बढ्ने जानकारी गराउनुभएको थियो ।
बिजमाण्डुको उक्त समाचारमा सम्माननीय राष्ट्रपतिज्यूसँगको भेटमा प्रधानमन्त्रीले विपक्षी गठबन्धनको तर्फबाट स्वतन्त्र व्यक्तिलाई राष्ट्रपति बनाउने तयारी भइरहेकाले आफूलाई साथ दिन राष्ट्रपतिसमक्ष आग्रह गरेको भन्ने समाचार बिल्कुल झुठो, भ्रामक र निन्दनीय छ । भेटमा यस प्रकारको कुनै छलफल नभएको स्पष्ट पार्दै प्रायोजित र भ्रामक समाचारको खण्डन गर्न सम्बन्धित सञ्चारमाध्यमलाई आग्रह गर्दछौँ ।
मिति : २० असार २०८१
सम्माननीय प्रधानमन्त्रीज्यूको सचिवालय
