Chairman Prachanda
 

विराटनगर, नेकपा अध्यक्ष प्रचण्डले पहिले लिएका नीतिहरु छोड्ने सर्तमा सीके राउतसँग ११ बुँदे सहमति गरिएको बताउनुभएको छ।

मंगलबार विराटनगर विमानस्थलमा सञ्चारकर्मीसँग कुरा गर्दै अध्यक्ष प्रचण्डले सरकार र पार्टीको ध्यान पृथकतावादी आन्दोलनमा लागेकाहरुलाई मुलधारको राजनीति एवं संविधानको मातहतमा ल्याउने तर्फ केन्द्रित भएको र त्यही प्रक्रिया अन्तर्गत रहेर स्वतन्त्र मधेस आन्दोलनका अगुवा राउतसँग सहमति गरिएको बताउनुभयो ।

सरकारले राष्ट्रिय अखण्डता, सार्वभौमसत्ता र स्वाधिनताका विषयमा कसैसँग सहमति नगर्ने बताउँदै अध्यक्ष प्रचण्डले राउतलाई आफ्ना कार्यकर्ता सम्झाउन समय लागेको हुनसक्ने टिप्पणी गर्नुभयो । यस विषयमा हतार गर्न जरुरी नभएको उहाँको जिकीर थियो ।

सरकारवारे बोल्दै अध्यक्ष प्रचण्डले मन्त्रिपरिषद् हेरफेरबारे प्रधानमन्त्री केपी शर्मा ओलीसँग आफ्नो छलफल भएको पनि बताउनुभयो । उहाँले भन्नुभयो – ‘मन्त्रिपरिषद् हेरफेरबारे छलफल भएको छ । आज बिहान पनि प्रधानमन्त्री र मेरो यस विषयमा कुरा भएको थियो । आवश्यक परे छलफल गरेर सामान्य हेरफेर गर्न सकिन्छ ।’

याे कुरा प्रधानमन्त्रीकाे अधिकार क्षेत्रभित्रको कुरा भएकोले आवश्यक मूल्यांकनका आधारमा छलफल गरेर हेरफेर गर्न सकिन्छ भनेर प्रधानमन्त्रीज्यूलाई भनेको पनि सञ्चारकर्मीलाई बताउनुभयो ।

एक अर्को प्रसंगमा बोल्दै अध्यक्षले संघले प्रदेशलाई अधिकार दिएन भन्ने आरोपको खण्डन गर्नुभयो । उहाँले भन्नुभयो – ‘संविधानको मर्म र भावना अनुसार काम गर्ने हो । संघले अधिकार दिने र खोस्ने कुरा नै होइन । संविधान अनुसार नै कामहरु हुनुपर्छ भन्ने हाम्रो मान्यता हो ।’

पार्टीभित्र उठेका केही असन्तुष्ट आवाजहरुलाई स्थायी कमिटी बैठकमा छलफल गरेर सम्बोधन गरिने उहाँकाे भनाइ थियाे ।