महेन्द्र मोरङ आदर्श क्याम्पस विराटनगरमा २०३६ सालतिर हाम्रा एकजना दाहाल थरका सहपाठीले एउटा स्थानीय निकायमा अस्थायी खरिदार पदको जागिरका लागि फारम भरेका थिए । फारममा चिनेको सुपरिचित व्यक्तिको नाममा सूर्यबहादुर थापा र नातामा सो व्यक्ति बा लेखेका थिए । सूर्यबहादुर थापा त्यस बखत नेपालका प्रधानमन्त्री थिए । अन्तर्वार्तामा जागिरका निवेदकलाई सोधियो तपाईँ दाहाल सूर्यबहादुर थापासँगको नातामा बा लेख्नुभएको छ, कस्तो बा ? उनको जबाफ थियो – मित बा ।
केपी शर्मा ओली अहिले नेपालका प्रधानमन्त्री छन् । उनलाई मधुशालादेखि रंगशालासम्म केपी बा भन्ने छोराछोरीहरूको बगाल नै छ । यो सत्ता दुरुपयोगको पुरानै परिपाटी हो । केपीका संसदीय विरोधीहरू संसद पुनःस्थापनापछि पनि सत्ताको गल्लीमा धतुराउँदै डुमेरो लाइरहेका छन् । केपीको सत्ता विवर्जन गर्ने छाँट देखिँदैन । असफल पार्टी अध्यक्ष र प्रधानमन्त्री सफल केपी बा बन्लान् ? मूल्याङ्कन आउने समयले गर्ने नै छ ।
बेलायतकी महारानी अलेक्जेन्ड्रिना भिक्टोरियाले लामो समय सन् १८३७ देखि १९०१ सम्म ६४ वर्ष शासन गरिन् । उनका पाँच छोरी र चार छोरा गरी नौ सन्तान थिए । उनीहरूको बिहाबारी युरोपका धेरै देशका राजघरानाहरूसँग भएको थियो । सन् १८४० मा उनी पहिलोपल्ट आमा, १८५९ मा हजुरआमा र १८७९ मा जिज्यूआमा बनिन् । सन् १८१९ मा जन्मिएकी भिक्टोरियाको ८२ वर्षको उमेरमा १९०१ मा मृत्यु हुँदा युरोपभरि उनका छोराछोरी, नातिनातिना र पनातिपनातिना गरी ३७ जना जीवितै थिए । त्यसैले उनलाई युरोपकी हजुरआमा भनियो । इतिहास खोतल्ने हो भने आम मानिसका असंख्य यस्ता उदाहरण पाइन्छन् तर चाटुकारहरूले सत्ताकै स्वार्थ सिद्ध गर्ने हो – ती भिक्टोरिया हुन् अथवा केपी ।
(लेखक त्रिभुवन विश्वविद्यालयमा प्राध्यापनरत हुनुहुन्छ ।)
