pm kp oli
 

काठमाडौं, प्रधानमन्त्री केपी शर्मा ओली भियतनाम र कम्बोडियाको औपचारिक भ्रमण सम्पन्न गरी बुधबार साँझ स्वदेश फर्किनुभएकाे छ। प्रधानमन्त्री ओलीले त्रिभुवन अन्तर्राष्ट्रिय विमानस्थलको अतिविशिष्ट कक्षमा भ्रमणबारे सञ्चारकर्मीसँग कुरा गर्दै भ्रमण अत्यन्त सफल भएको प्रतिकृया दिनुभयाे।

उहाँले भ्रमणका क्रममा दुई पक्षीय सम्बन्धका सारभूत पक्षहरूमा छलफल भएको चर्चा गर्दै लुम्बिनीको विकासमा अन्तर्राष्ट्रिय सद्भाव र सहयोग जुटाउन भ्रमणले महत्वपूर्ण अवसर प्रदान गरेको बताउनुभयाे। उहाँले दुवै देशका प्रधामन्त्रीले लुम्बिनीको भ्रमण गर्ने इच्छा समेत व्यक्त गर्नुभएको जानकारी दिनुभयाे ।

प्रधानमन्त्री ओलीले भियतनाम  र नेपालबीच परम्परागत रुपमा रही आएको सम्बन्धलाई अझ प्रगाढ बनाउने विषयमा सहमति भएको धारणा राख्नुभयाे। भ्रमणका उपलब्धिको चर्चा गर्दै उहाँले कूटनीतिक राहदानी र सरकारी राहदानी वाहकलाई भिसा छुट गर्ने, परराष्ट्र मन्त्रालयहरुबीच दुई पक्षीय संयन्त्र स्थापना गर्ने र नेपाल तथा भियतनामबीच लगानी तथा व्यापार सम्झौता गर्नेसम्बन्धी आशयपत्र आदानप्रदान गर्ने जस्ता सम्झौतामा हस्ताक्षर भएको जानकारी दिनुभयाे ।

प्रधानमन्त्री ओलीले पत्रकार सम्मेलनमा सञ्चारकर्मीको जिज्ञासा सम्बोधन गर्दै आफूले मर्यादित संसद्मा गैरसंसदीय शब्द प्रयोग नगरेको पनि प्रष्ट्याउनुभयाे। उहाँले भन्नुभयाे – ‘संसदमा केही उत्ताउला, अमर्यादित, असंसदीय शब्दहरु प्रयोग भएका हुन्, ती डिलिट गरिएका हुन्। सभामुखले त्यसैलाई सङ्केत गर्नुभएको हो। संसद् मर्यादित थलो हो । मर्यादा राख्नुपर्छ।’

प्रधानमन्त्रीले जनताबाट निर्वाचित राज्यका सर्वोच्च निकायमाथि नियोजित रुपमा अपमान गर्ने प्रवृत्ति बढिरहेको बताउनुभयाे । उहाँले भन्नुभयाे – ‘सामन्ती संस्थाहुँदा त्यसको मर्यादा राख्नुपर्छ त्यसकाविरुद्ध बोल्नुहुन्न भन्नेहरु अहिले जनताबाट निर्वाचित लोकतन्त्रका आधारभूत संस्थाहरू, जननिर्वाचित मर्यादित राज्यका सर्वोच्च निकायमाथि अपमान गर्नु आफ्नो बहादुरी ठान्ने प्रवृत्ति देखापरेको छ।’

ओलीले नेपाली समाज अब आधुनिक, विकसित, सभ्य समाजको रुपमा विकसित हुन गइरहेको बताउनुभयाे। संसदमा प्रस्तुत विधेयकमाथि छलफल र आवश्यकताअनुसार परिमार्जन गर्न सकिने अवस्थामा आवेशमा च्यातेर संसदीय गरिमा घटाएको उहाँको भनाइ थियो। उहाँले सरकारले हचुवाको भरमा विधेयक नल्याएको समेत स्पष्ट पार्नुभयाे ।

नेपाली प्रतिनिधिमण्डलमा प्रधानमन्त्री ओलीका धर्मपत्नी राधिका शाक्य, परराष्ट्रमन्त्री प्रदीपकुमार ज्ञवाली, प्रधानमन्त्रीका प्रमुख सल्लाहकार विष्णुप्रसाद रिमाल, परराष्ट्र सल्लाहकार डा. राजन भट्टराईलगायत उच्चपदस्थ कर्मचारी, उद्यमी, व्यवसायी, पत्रकारको सहभागिता थियो।