काठमाडौँ। राष्ट्रपति विद्यादेवी भण्डारीले सीमा वारपार रेलमार्ग, सडक तथा सुरुङ निर्माण लगायतमा हुने सहकार्यले नेपाल र जनगणतन्त्र चीनका जनतालाई अझ नजिक ल्याउने र नेपालको सामाजिक-आर्थिक विकासमा रूपान्तरणकारी भूमिका निर्वाह गर्ने विश्वास व्यक्त गर्नुभएको छ ।
हिमालयपार बहुआयामिक सम्पर्क सञ्जाल सहयोग सम्बन्धमा नेपाल र जनगणतन्त्र चीनका राजनीतिक दल बिचको संयुक्त परामर्श संयन्त्रको पहिलो बैठकमा शुभकामना सन्देश पठाउँदै राष्ट्रपति भण्डारीले दुवै मुलुकका राजनीतिक दल बिच नियमित संवादका लागि परामर्श संयन्त्र स्थापनाले नेपाल चीन बिचको सम्बन्ध थप प्रगाढ तुल्याउन विशेष योगदान पुग्ने बताउनु भएको छ ।
राष्ट्रपति भण्डारीको उक्त लिखित सन्देश भर्चुअल बैठकमा राष्ट्रियसभाका अध्यक्ष गणेशप्रसाद तिमिल्सिनाले प्रस्तुत गर्नुभएको थियो । राष्ट्रपति भण्डारीले नेपाललाई भूपरिवेष्टितबाट विश्वका अन्य मुलुक र भूभागसँग बहुआयामिक माध्यमबाट सहज ढङ्गले जोडिएको आधुनिक र विकसित मुलुकका रूपमा रूपान्तरण गरी ‘समृद्ध नेपाल, सुखी नेपाली’को साझा राष्ट्रिय संकल्पलाई साकार तुल्याउन व्यापक पूर्वाधार विकास र पर्याप्त आर्थिक लगानी एवम् प्राविधिक विकासको खाँचो औँल्याउँदै पूर्वाधार निमाण र सम्पर्क सञ्जालको विकास बेल्ट एण्ड रोड सहयोगको एक महत्त्वपूर्ण उद्देश्य भएकाले यसको प्रबर्द्धन गर्दै हिमालयपार बहुआयामिक सम्पर्क सञ्जालको निर्माणमा चीनसँगको साझेदारीलाई अघि बढाउन नेपाल सरकार प्रतिबद्ध रहेको अवगत गराउनुभयो ।
राष्ट्रपति भण्डारीले नेपाल र चीन बिच कूटनीतिक सम्बन्ध स्थापना भएको ६५औँ वर्ष पूरा भएका अवसरमा जनवादी गणतन्त्र चीनका राष्ट्रपति सी चिनफिङ तथा चिनियाँ कम्युनिस्ट पार्टी र त्यहाँका जनताप्रति शुभेच्छा व्यक्त गर्दै बैठकबाट दुवै देशले आपसी लाभ लिनसक्ने अपेक्षा व्यक्त गर्नुभयो ।
नेपाल एक चीन नीतिलाई पूर्ण रुपले अंगीकार गर्ने देश हो । नेपाल र जनवादी गणतन्त्र चीन प्राचीन सभ्यता र समृद्ध संस्कृतिद्वारा अनुप्राणित मैत्रीपूर्ण सम्बन्धमा आबद्ध असल छिमेकी मुलुक हुन् । नेपाल एक चीन नीतिप्रति सदैव प्रतिबद्ध रहिआएको छ। तिब्बत, ताइवान, हङकङ एवम् सिन्जियाङसम्बन्धी मामिलामा चीनप्रति नेपालको पूर्ण साथ र समर्थन छ। नेपालले आफ्नो भूमिमा चीनविरोधी कुनै पनि गतिविधि हुन दिएको छैन र भविष्यमा पनि हुन दिने छैन ।
राष्ट्रपति भट्टराईले गत वर्ष आफूले गरेको चीनको राजकीय र चीनका राष्ट्रपतिले गरेको नेपालको राजकीय भ्रमणको स्मरण गर्दै राष्ट्रपति सीले गरेको भ्रमण नेपाल र चीनबीच प्राचीनकालदेखि कायम रहिआएको मैत्रीपूर्ण एवम् सहयोगात्मक सम्बन्ध सुदृढीकरणका लागि एक महत्त्वपूर्ण कोशेढुङ्गा सावित भएको बताउनुभयो । उहाँले दुवै देशले द्विपक्षीय सम्बन्धको विकास र समृद्धिका लागि अटुट मित्रतापूर्ण रणनीतिक सहयोगात्मक साझेदारी स्तरोन्नति गर्दै ‘वन बेल्ट वन रोड इनिसिएटिभ’ अन्तर्गत हिमालयपार बहुआयामिक सम्पर्क सञ्जाल सहयोगको निर्माणका लागि हातेमालो गरी अघि बढ्ने अठोट प्रकट गरेको उल्लेख गर्नुभयो ।
नेपाल चीन सीमामा थप नाका सञ्चालनमा ल्याई जनताको आवागमन र व्यापार सहजीकरणलाई सहयोग पुर्याउने प्रशस्त सम्भावना रहेकाले यस कार्यमा दुवै सरकारको प्राथमिकता रहने विश्वास प्रकट गर्दै राष्ट्रपति भण्डारीले गत अप्रिलमा राष्ट्रपति सीसँग आफ्नो टेलिफोन वार्ताका अवसरमा दुई देशबीच कोभिड-१९ विरुद्धको लडाइँमा द्विपक्षीय सहयोगलाई सबल पार्ने र महामारीको अन्त्यपछि ‘वन बेल्ट वन रोड’ अन्तर्गतको सहयोगलाई द्रुत गतिले अघि बढाउने सम्बन्धमा छलफल भएको उल्लेख गरिन् ।
चीनले विभिन्न क्षेत्रमा उल्लेखनीय प्रगति गरेको जनाउँदै राष्ट्रपति भण्डारीले शताब्दीका दुई महान् लक्ष्य प्राप्तिमा चीन सरकारलाई पूर्ण सफलता प्राप्त हुनेछ भन्ने दृढ़ विश्वास व्यक्त गर्नुभयो । उहाँले चीनको विकास र समृद्धि नेपालका लागि समेत एउटा महत्वपूर्ण अवसर बताउनु भएको थियो ।
सम्मेलनमा प्रधानमन्त्री केपी शर्मा ओलीको पनि शुभकामना सन्देश प्रस्तुत गरिएको थियो । सत्तारुढ नेपाल कम्युनिस्ट पार्टी (नेकपा) का अध्यक्ष पुष्पकमल दाहाल ‘प्रचण्ड’, प्रमुख प्रतिपक्षी नेपाली कांग्रेसका नेता डा. प्रकाशशरण महत, जनता समाजवादी पार्टीका वरिष्ठ नेता डा. बाबुराम भट्टराई तथा चीनका तर्फबाट पनि उच्चस्तरीय प्रतिनिधिले सम्बोधन गरी दुई देश बिचको सम्बन्ध र साझेदारीलाई थप प्रभावकारी बनाउन साझा मत व्यक्त गर्नुभएको थियो ।
