Flag of All Nepal Peasants' Federation (Revolutionary Centre)
 

काठमाडौँ । नेपाल कम्युनिस्ट पार्टी (नेकपा) का दुई किसान महासंघहरुको बिचमा सम्मानजनक र सौहार्दपूर्ण रुपमा एकता प्रक्रिया सम्पन्न भएको छ ।

नेपाल कम्युनिस्ट पार्टी (नेकपा) को मिति २०७६ जेष्ठ ०२ गतेको पार्टी केन्द्रीय सचिवालयको निर्णय र निर्देशन बमोजिम एकीकृत किसान संगठनका संयोजक क. वामदेव गौतम र सहसंयोजक क. चित्रबहादुर श्रेष्ठको पहलमा तत्कालीन दुई किसान संगठनहरु अखिल नेपाल किसान महासंघ र अखिल नेपाल किसान महासंघ (क्रान्तिकारी केन्द्र) को केन्द्रीय समितिको एकता प्रक्रिया सम्पन्न भएको छ भने मातहतका समितिहरुको एकता प्रक्रिया अगाडि बढेको छ ।

किसान संगठन नेपाल कम्युनिस्ट पार्टी (नेकपा) मा केन्द्रीय समितिको तहमा एकता प्रक्रिया टुंगाउने पहिलो जनवर्गीय संगठन बन्न सफल भएको छ । २०७६ जेठ ३१ गतेदेखि असार ०६ गतेसम्म बसेको संयुक्त भेलाले एकता प्रक्रियाका लागि दुई नेताहरुका प्रस्तावहरुलाई सर्वसम्मतले पारित गर्दै एकता प्रक्रियालाई गति दिएको हो ।

भेलामा संयोजक र सहसंयोजकले प्रस्तुत गर्नुभएको अखिल नेपाल किसान महासंघको विधान र राजनीतिक प्रतिवेदनसमेत परिमार्जनसहित सर्वसम्मतिबाट पारित भएको छ भने दुई महासंघहरुको एकता बराबरीको आधारमा हुने गरी सहमति भएको छ । एकीकृत किसान महासंघको नाम एमाले पक्षको र झण्डा माओवादी पक्षको, लोगो मिश्रित, स्थापना मिति माओवादी पक्षले मान्दै आएको र किसान गीत एमाले पक्षले गाउँदै आएको हुने गरी सहमति भएको छ ।

दुई किसान महासंघहरुको सहमतिअनुसार अखिल नेपाल किसान महासंघ र अखिल नेपाल किसान महासंघ (क्रान्तिकारी केन्द्र) को एकता पश्चात बन्ने एकीकृत किसान संगठनको नाम ‘अखिल नेपाल किसान महासंघ’ रहनेछ ।

विगतमा दुवै किसान महासंघहरुको झण्डा समेत फरक फरक रहेकोमा एकता पश्चात एकीकृत किसान महासंघको झण्डा रातो पृष्ठभूमिमा हँसिया र तारा अंकित झण्डा रहने गरी सहमति भएको छ ।

त्यसरी नै किसान संगठनको लोगो पनि विगतमा फरक फरक रहेकोमा यसपटक रातो पृष्ठभूमिमा हँसिया तारा अंकित, छेऊमा धानको बाला भएको र बिचमा किसान महासंघ लेखेको हुनेगरी मिश्रित लोगो रहने भएको छ ।

दुई किसान महासंघको बिचमा तत्कालीन अखिल नेपाल किसान संघको स्थापना मितिको सम्बन्धमा रहेको विवाद सम्बन्धमा पनि सहमति भएको छ । नयाँ सहमति अनुसार तत्कालीन अखिल नेपाल किसान संघको स्थापना २००७ साल फागुन १४ गते भएको र सोको घोषणा २००८ साल वैशाख १७ गते काठमाडौँको टुँडिखेलमा भएको उल्लेख गर्ने सहमति भएको छ ।

तत्कालीन नेकपा (एमाले)का वरिष्ठ उपाध्यक्ष क. वामदेव गौतम स्वयम् अखिल नेपाल किसान महासंघको अध्यक्ष भएको हुनाले एमालेभित्र किसान संगठनलाई शक्तिशाली संगठन मानिन्थ्यो भने तत्कालीन नेकपा (माओवादी केन्द्र) भित्र पनि पुराना कम्युनिस्ट नेता क. चित्रबहादुर श्रेष्ठले नेतृत्व गरेको अखिल नेपाल किसान महासंघ (क्रान्तिकारी केन्द्र) लाई सबैभन्दा व्यवस्थित र शक्तिशाली संगठन मानिँदै आएको थियो ।

देशको दुई तिहाई जनसंख्या ओगट्ने किसानहरुको नेतृत्व गर्ने देशका दुई वटा सबैभन्दा ठूला र शक्तिशाली किसान महासंघहरुको एकतालाई अर्थपूर्ण रुपमा हेरिएको छ ।