काठमाडौँ । नेपाल कम्युनिस्ट पार्टी (नेकपा) का अध्यक्ष क. पुष्पकमल दाहाल ‘प्रचण्ड’ले ग्याल्बो ल्होसारको उपलक्ष्यमा स्वदेश तथा विदेशमा रहनुभएका शेर्पा समुदायका सम्पूर्ण नेपाली दिदीवहिनी तथा दाजुभाइहरुमा हार्दिक शुभकामना व्यक्त गर्नुभएको छ ।
शेर्पा समुदायले मनाउने महान चाडको अवसरमा एक शुभकामना सन्देश जारी गर्दै अध्यक्ष प्रचण्डले, शुभकामना प्रदान गर्नू भएको हो ।
शुभकामना सन्देशमा अध्यक्ष प्रचण्डले नेपाली समाज बहुजातीय, बहुभाषिक र बहुसांस्कृतिक विविधताले भरिएको उल्लेख गर्दै अनेक जातीय समुदायसँगको सामिप्यता र सम्मानजनक सामाजिक सद्भाव नेपाली समाजको विशेषता भएको र देशको यही विविधता भित्रको एकता नै नेपाल र नेपालीको मौलिक पहिचान भएको विचार व्यक्त गर्नुभएको छ ।
अध्यक्ष प्रचण्डद्वारा जारी शुभकामना सन्देशको पूर्ण पाठः
ग्याल्बो ल्होसारको उपलक्ष्यमा स्वदेश तथा विदेशमा रहनुभएका शेर्पा समुदायका सम्पूर्ण नेपाली दिदीवहिनी तथा दाजुभाइहरुमा हार्दिक शुभकामना व्यक्त गर्दछु ।
नेपाली समाज बहुजातीय, बहुभाषिक र बहुसांस्कृतिक विविधताले भरिएको छ । अनेक जातीय समुदायसँगको सामिप्यता र सम्मानजनक सामाजिक सद्भाव नेपाली समाजको विशेषता हो । देशको यही विविधता भित्रको एकता नै नेपाल र नेपालीको मौलिक पहिचान हो ।
नेपाली जनसमुदायमा आपसी भातृत्व, मित्रता, सामाजिक सद्भाव र राष्ट्रिय एकता सुदृढ गर्दै देशलाई आर्थिक समृद्धिमा लैजान यस पर्वले सबैमा प्रेरणा मिल्ने विश्वास लिएको छु ।
अन्त्यमा, यस पर्वका अवसरमा सम्पूर्ण नेपाली जनसमुदायको सुख, शान्ति, समृद्धि, सुस्वास्थ्य र उत्तरोत्तर प्रगतिको कामना गर्दछु ।
१२ फागुन, २०७६
पुष्पकमल दाहाल ‘प्रचण्ड’
अध्यक्ष
