सफा सुग्घर भै आफू बस्नुपर्छ सँधैभरि
बिहान उठ्नु सबेरै नुहाउनू सफा गरी
हातमुख धुनू फेरी ध्यान योग गरी वरी
खाजा नास्ता लिई खाऊँ बनाएर मीठो गरी ।
धुनुपर्छ सधै आफ्ना लुगाफाटाहरु पनि
फोहोर रोगको बस्ती पखाल्नुपर्छ है भनी
घर करेसी सफा होस् सँधै सुन्दर राख्नू
बाहिरबाट आउँदा हात मुख सधै धुनू ।
चुलो चौका सधै सफा खानु ताजा कुराहरु
मान्छेको साथमा बस्दा होसियार भइरहूँ
भन्ने कुरा कुनै नौलो होइन आज मात्रको
फोहोरसँग होस् त्रास त्यो नै हो बीज रोगको ।
भन्ने कुरा सँधैको हो अहिले मात्र के छ र
किन यो कुर्लिने बाटो बनेको छ सरावर
कोरोना मात्र होइन फोहोरी यदि भो भने
अरु अनेक लाग्नेछन् रोगको घर भइरहने ।
यसैले यो कोरोनाको मात्र हल्ला पछि किन
आऊ सफा र सुग्घरी हुनु पर्दछ दिनदिन
यो लाग्छ व्यापारी हल्ला यसैको भरमा अब
धनी देश धनी हुन्छन् औषधी बेचिँदा सब ।
औषधी प्रविधि सारा उनैको भर पर्नुछ
साग मात्रै लगाउन अल्छी आएर गाँज्दछ
बाँझा छन् बारी ती खेत कति अन्न रऔषधी
फल्दथे बेच्दथ्यौँ त्यही खान्थ्यौँ हामी कुटी पिँधी ।
आज छैन सबै मान्छे खाडी र देश देशमा
बारी करेसा बाँझै छन् फल्दैन मुठी यसमा
यसैले रोगको त्राश कहिले गरिबीको पनि
हामीले भोग्नु भोग्दैछौँ सबै छौँ दुःखमा भनी ।
अहिले बन्द भो सारा कतै चल्न नपाइने
जान आउन क्यै छैन सवारी गड्गडाउने
यस्तो अचम्म भो विश्व ठिकै भो प्रकृति पनि
खुसीले स्वास लिइन्छ धुलो धुँवा हट्यो भनी ।
यसैले भई होसियार आफ्नो काम गरिरहूँ
त्राशमा बस्नु बेकार सफा सुग्घर भैरहूँ
कोरोना जान्छ धोएर हातमुख सँधै भरी
यस्तो संकट आउँछ जीवनमा घरी-घरी ।
काठमाडौँ, नेपाल ।
